Массово-политическая газета Березовского района

Музей прымаў гасцей

199
Опубликовано,
28 марта 2017

540-й гадавіне роднага горада Бярозаўскі гісторыка-краязнаўчы музей прысвячае цыкл музейных вечароў “Горад у панараме стагоддзяў”. Праходзіць яны будуць кожны апошні чацвер месяца да канца года.

540-й гадавіне роднага горада Бярозаўскі гісторыка-краязнаўчы музей прысвячае цыкл музейных вечароў “Горад у панараме стагоддзяў”. Праходзіць яны будуць кожны апошні чацвер месяца да канца года. А ў лютым многія жыхары Бярозы сталі сведкамі рэтра-вечара “Скарбы бярозаўскай зямлі”. Трэба адзначыць, што наведвальнікаў было многа: сярод іх і вучні СШ №1 г. Бярозы разам з класным кіраўніком Г.Я. Шапкоўскай, і моладзь, і людзі сярэдняга і сталага ўзросту.             

На пачатку свята дырэктар музея Л.М. Ківатыцкая цёпла вітала ўсіх прысутных, падзякавала за любоў да гісторыі свайго краю, расказала аб плане вечара. У зале “Гісторыя бярозаўскіх зямель ад першабытнаабшчыннага ладу да пачатку ХVІІ стагоддзя” старшы супрацоўнік музея Г.С. Краўчук пазнаёміла з археалагічнымі знаходкамі Бярозаўшчыны. Як заварожаныя, слухалі прысутныя цікавы аповед Галіны Сяргееўны, разглядалі экспанаты. І пераносіліся ў сівую даўніну свайго краю. Найбольшую цікавасць выклікаў малецкі клад старажытнарымскіх дынарыяў I – II стагоддзяў нашай эры, знойдзены ў 1993 годзе на мелавым кабакоўскім кар’еры.

Прыемна былі здзіўлены наведвальнікі музея выставай “Мінералы Бярозаўшчыны”. Яе прадставіла супрацоўнік музея А.В. Мюллер (на здымку). Мы прывыклі, што “вось там, недзе, там – прырода, там – краса…” І раптам – адкрыццё. Аказваецца, і наша зямелька тоіць у сабе так многа. Мінералы знаходзяцца ў фондах музея і выстаўлены былі з нагоды свята. Аксана Валер’еўна аповед аб іх падмацоўвала легендамі. І атрымалася так цікава, што многім прыйшлося па некалькі разоў спыняцца каля экспанатаў.

Пасля вандроўкі ў далёкае мінулае знаходак нашай зямлі супрацоўнікам музея А.У. Драган была праведзена пазнавальная гульня “Археалагічнае лато”. У ёй удзельнічалі вучні СШ №1 г. Бярозы, пераможцы былі адзначаны сувенірамі.

Карысна было паглядзець навукова-папулярны фільм “На дне беларускага мора” пра фарміраванне ў дагістарычны перыяд нашага Палесся.

Наведвальнікі не спяшаліся пакідаць музей: зноў і зноў падыходзілі да таго ці іншага экспаната. І супрацоўнікі музея з радасцю адказвалі на пытанні. Некаторыя з прысутных гасцей вечара былі ў музеі ўпершыню. Ім хацелася пазнаёміцца і з іншымі заламі. Папрасілі правесці экскурсію ў экспазіцыі, прысвечанай падзеям Вялікай Айчыннай вайны. І трэба было бачыць, з якой увагай слухалі аб земляках-героях.

Вечар удаўся. Гэта ўжо можна канстатаваць нават па тым, што ўсе залы другога паверха былі запоўнены, і па тым, што людзі не спяшаліся разыходзіцца і прасілі паведаміць аб часе наступнай сустрэчы. Значыць, ёсць цікавасць да гісторыі сваёй зямелькі, да таго, што яна тоіць у сабе. А такая цікавасць і з’яўляецца доказам любові да свайго самага лепшага, найпрыгажэйшага краю. Застаецца шчыра падзякаваць усяму калектыву гісторыка-краязнаўчага музея за творчыя адносіны да сваёй працы, грунтоўную падрыхтоўку, жаданне як мага глыбей зазірнуць у гісторыю сваёй зямлі, уменне паказаць землякам яе скарбы і цікавую сівую мінуўшчыну.

Галіна ХАЛІМОНЧЫК, г. Бяроза.

Фота Разаліі КАРПЕШ.

Оставьте свой комментарий